Gjykata e Sarandës ka vendosur të lirojë nga paraburgimi 17-vjeçarin K. Cora, duke caktuar për të masën e sigurisë “Arrest në shtëpi”. I riu u arrestua të enjten nga policia, pasi dyshohet se ka plagosur me thikë bashkëmoshatarin e tij, B. Kalemi, në rrugën “Butrinti” të Sarandës.
Ngjarja ndodhi pas një konflikti mes të rinjve, ku Kalemi u godit tre herë me thikë në stomak dhe ije. Ai u transportua me urgjencë në Spitalin e Vlorës për trajtim të specializuar, ndërsa një person i tretë, shok i autorit, u shoqërua nga policia për të dhënë dëshmi mbi rrethanat e ngjarjes.
Pas hetimeve, Prokuroria e Sarandës ndryshoi akuzën ndaj Corës, duke deklaruar se ai ka vepruar në kushtet e vetëmbrojtjes.
Prokurorja Esmeranda Basho e cilësoi ngjarjen si “Plagosje e rëndë në kapërcim të kufijve të mbrojtjes së nevojshme” dhe kërkoi që ndaj të riut të caktohej masa “Arrest në shtëpi”, e cila u miratua nga gjyqtarja Edona Vajushi.
Sipas vendimit, Cora do të qëndrojë në banesën e tij në lagjen nr. 4, rruga “Guri Nazifi”, me përjashtim të orareve të ndjekjes së shkollës dhe aktiviteteve edukuese, të cilat do të lejohen me miratim nga prokuroria.
Mbetet e paqartë arsyeja e ndryshimit të akuzës për plagosjen e 17-vjeçarit që ndodhet ende në spital.
Në një deklaratë për media babai i të plagosurit ka kërkuar nga organet ligjzbatuese që të arrestohet dhe autori i dytë, pasi nëse nuk vepron ligji ai do të bëjë vetëgjyqësi. Babai tha se është hera e dytë që personat e ndaluar i kanë dhunuar brutalisht të birin.
Lini një koment