Këshilli Bashkiak i Sarandës ka kundërshtuar njëzëri kërkesën e Shoqërisë Ujësjellës-Kanalizime Rajoni Sarandë për rritjen e tarifave të ujit të pijshëm dhe kanalizimeve. Propozimi parashikonte rritjen e çmimit të ujit nga 60 në 65 lekë për metër kub, pa përfshirë TVSH-në.
Gjatë shqyrtimit të dokumentacionit u evidentua edhe një mospërputhje në formulimin e kërkesës. Ndërsa në objektin e saj çështja paraqitej për diskutimin e tarifave të reja, në përmbajtje kërkohej miratimi i tyre nga Këshilli Bashkiak.
Qëndrimi kundër rritjes së tarifave u shpreh që në fillim të mbledhjes nga këshilltarët e majtë, të cilët kërkuan ruajtjen e kuorumit për të mundësuar vijimin e mbledhjes dhe marrjen e një vendimi. Kjo pasi këshilltarët e Partisë Demokratike mungonin në mënyrë të organizuar. Në mbledhje morën pjesë gjithashtu këshilltarë të pavarur dhe përfaqësues të partive të vogla.
Gjatë diskutimeve, këshilltarët argumentuan se një rritje e tillë nuk justifikohet për sa kohë Saranda, Ksamili dhe zonat përreth vijojnë të përballen me probleme të furnizimit me ujë, i cili në shumë raste sigurohet vetëm për disa orë në ditë. Situata bëhet edhe më problematike gjatë sezonit turistik, kur banorët dhe bizneset detyrohen të sigurojnë furnizim alternativ, duke përballuar kosto shtesë.
Në përfundim, këshilltarët e pranishëm vendosën të mos mbështesin propozimin dhe të përcjellin një përgjigje zyrtare refuzuese ndaj shoqërisë së ujësjellësit. Në këtë mënyrë, kërkesa për rritjen e tarifave të ujit dhe kanalizimeve nuk mori miratimin e Këshillit Bashkiak të Sarandës.
Lini një koment