Policia Kufitare në Qafë Botë, në bashkëpunim me patrullat e Agjencisë Evropiane për Rojën Kufitare dhe Bregdetare (FRONTEX), ka goditur një tjetër rast të trafikimit të paligjshëm të emigrantëve, duke arrestuar në flagrancë një shtetas britanik 31-vjeçar.
Sipas njoftimit zyrtar, gjatë kontrolleve të shtuara në kuadër të operacionit për parandalimin e kalimeve të paligjshme përgjatë vijës së gjelbër kufitare, forcat e Policisë identifikuan mbrëmjen e kaluar në zonën e Kataetos një individ që po shoqëronte një grup prej 7 emigrantësh të paligjshëm, me destinacion Greqinë. Hetimet paraprake zbuluan se 31-vjeçari, me inicialet F. K., banues në Mbretërinë e Bashkuar, kishte ndërmarrë këtë veprimtari kundrejt pagesës.
Ai u arrestua në vendngjarje për veprën penale “Dhënia e ndihmës për kalim të paligjshëm të kufijve shtetërorë”. Materialet procedurale në ngarkim të tij janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Sarandë, për vijimin e hetimeve.
Policia Kufitare dhe FRONTEX konfirmojnë se operacionet e përbashkëta do të vijojnë me intensitet në zonat me risk të lartë, me qëllim garantimin e rendit dhe parandalimin e veprimtarive të paligjshme përgjatë kufirit shqiptaro-grek.
Lini një koment