Një familje në Sarandë ka kërkuar ndihmë institucionale për përballimin e situatës së rënduar që po shkakton djali i tyre 15-vjeçar, i cili sipas babait dhe gjyshes, ushtron dhunë fizike dhe psikologjike ndaj tyre. Ata pretendojnë gjithashtu se i riu ka ngacmuar seksualisht gjyshen 85-vjeçare, e cila jeton në të njëjtën banesë.
Në rrëfimin e tij për emisionin “Fiks Fare”, babai i të riut thotë se dhuna ka qenë e vazhdueshme dhe agresiviteti është shtuar ndjeshëm kohët e fundit, sidomos pas përdorimit të substancave narkotike dhe alkoolit nga djali. Sipas tij, i biri ka pasur probleme të shëndetit mendor që në fëmijëri, por gjendja është përkeqësuar me kalimin e viteve.
Familja jeton në kushte të vështira ekonomike, në një banesë me qira, ku tashmë situata është bërë e paqëndrueshme. Babai tregon se djali shkatërron gjithçka në shtëpi, del pa orar dhe qëndron larg për ditë të tëra. Ai shton se nëna e tij, gjyshja e djalit, është viktimë e dhunës fizike dhe psikologjike, por edhe e një akti të rëndë ngacmimi seksual.
“Jetoj me frikë. Ai është zhveshur para meje dhe ka tentuar të kryejë marrëdhënie seksuale”, rrëfen e moshuara mes lotësh.
Pamjet filmike të dhomës së të riut, të siguruara nga emisioni, tregojnë për një ambient të rrëmujshëm dhe të dëmtuar, që përforcojnë pretendimet e familjarëve.
Familja ka bërë disa herë denoncim në Komisariatin e Policisë Sarandë. Së fundmi, ata kanë raportuar për dhunën ndaj 85-vjeçares, rast i cili është trajtuar nga gjykata. Kjo e fundit, në vendimin e saj, ka urdhëruar largimin e gjyshes nga shtëpia dhe ndjekjen e djalit me një psikologe. Por e moshuara kundërshton këtë zgjidhje, pasi nuk ka një vend ku të strehohet, në fshat, sipas saj, ekziston vetëm një kasolle e pabanuar.
Babai dhe gjyshja apelojnë që autoritetet të marrin masa për dërgimin e të riut në një qendër rehabilitimi ose një institucion riedukimi, ku ai të mund të trajtohet siç duhet për problemet e tij të shëndetit mendor dhe varësitë. Ata shprehen se nuk duan ndëshkim, por zgjidhje reale për një situatë që po bëhet gjithnjë e më e rrezikshme për ta.
Në bashkëpunim me gazetarët e “Fiks Fare”, familja është paraqitur sërish pranë Komisariatit të Sarandës për të bërë një tjetër denoncim, në shpresë se do të ndërhyhet për të garantuar sigurinë e tyre dhe ndihmën që u nevojitet.
Lini një koment