Një akt trimërie nga një emigrant shqiptar në Greqi ka tërhequr vëmendjen e publikut dhe institucioneve shtetërore greke. Levia Goga, me origjinë nga Berati, ndërhyri pa hezitim për të shpëtuar dy fëmijë të mitur që po rrezikoheshin nga uji në lumin Arakthos. Ngjarja ndodhi javën e kaluar në qytetin e Artës, ku Goga, duke u ndodhur pranë vendit të ngjarjes, la gjithçka dhe u hodh në lumë për të ndihmuar fëmijët.
Pavarësisht përpjekjeve heroike, të miturit nuk arritën të mbijetojnë dhe ndërruan jetë më vonë në spital. Pas ndërhyrjes së tij, Goga raportoi shqetësime shëndetësore si kollë të fortë dhe vështirësi në frymëmarrje. Ai u vizitua fillimisht nga një mjek privat, i cili rekomandoi ekzaminime të mëtejshme në spital.
Menjëherë pas informimit për rastin, Ministri grek i Shëndetësisë, Adonis Georgiadis, urdhëroi që një ambulancë e shërbimit kombëtar EKA të dërgohej për ta transportuar Goga-n në spitalin e Artës. Mjekët konfirmuan se gjendja e tij shëndetësore nuk është serioze dhe po i nënshtrohet analizave të detajuara.
Në shenjë vlerësimi për aktin e tij të guximshëm dhe njerëzor, autoritetet greke kanë vendosur ta shpërblejnë Levia Goga-n me shtetësinë greke si një nder i posaçëm.
Levia Goga emigroi në Greqi 24 vite më parë, kur ishte vetëm 17 vjeç. Ai jeton aktualisht në qytetin e Artës me bashkëshorten dhe dy fëmijët e tij, të moshës 10 dhe 6 vjeç. Për shumë vite, ai ka punuar në punë të ndryshme për të siguruar jetesën e familjes së tij, duke jetuar një jetë modeste dhe larg vëmendjes publike.
Ngjarja tronditëse e së mërkurës i ndryshoi jetën. Goga, pa u menduar dy herë, reagoi si një qytetar i përgjegjshëm dhe si një njeri me ndjenja të thella humane. Akti i tij ka prekur zemrat e shumë njerëzve në Greqi dhe Shqipëri, duke u bërë simbol i guximit dhe solidaritetit përtej kufijve.
Lini një koment