Një plagosje me armë zjarri është shënuar në orët e para të së hënës në fshatin Markat tw Konispolit. Saimir Haxhi, 44 vjeç, banor i zonës, është qëlluar me armë gjahu (çifte) dhe ka mbetur i plagosur në pjesën e pasme të trupit.
Sipas burimeve paraprake, dyshohet se Haxhi mund të ketë tentuar të vjedhë në një banesë në fshat dhe është qëlluar nga një person ende i paidentifikuar. Mësohet se i plagosuri ka precedent penal dhe rezulton i shpallur në kërkim për veprën penale “Keqtrajtimi i të miturve”.
Ngjarja ka ndodhur rreth orës 02:00 të mëngjesit, kur Haxhi është transportuar fillimisht në spitalin e Sarandës për ndihmën e parë dhe më pas është dërguar me ambulancë drejt spitalit të Vlorës për mjekim të specializuar. Aktualisht ai ndodhet jashtë rrezikut për jetën.
Njoftimi i Policisë:
“Më datë 07.07.2025, rreth orës 03:45, në spitalin e Sarandës është paraqitur shtetasi S. H., 44 vjeç, banues në fshatin Markat, i dyshuar i dëmtuar me armë gjahu në këmbë. Ky shtetas ka deklaruar se është qëlluar aksidentalisht nga një gjuetar i paidentifikuar, në zonën ndërmjet fshatrave Shalës–Vagalat.”
Grupi hetimor ndodhet në vendngjarje dhe po punon për zbardhjen e plotë të rrethanave, identifikimin e autorit dhe verifikimin e deklarimeve të të plagosurit.
Lini një koment