Partia Socialiste ka arritur të sigurojë mandatin e nëntë në qarkun e Vlorës, falë votave të para të numëruara nga Diaspora. Ky mandat i është zbritur Partisë Demokratike, duke e lënë opozitën me vetëm tre mandate në qarkun më jugor të vendit.
Rezultati fillestar pas numërimit të votave brenda territorit të Shqipërisë ishte 8 me 4 në favor të PS-së, por me nisjen e numërimit të votave të Diasporës, raporti i forcave ka ndryshuar ndjeshëm. Pas përpunimit të rreth 30% të votave nga emigracioni për Vlorën, Partia Socialiste kryeson me afro 60% të tyre, ndërsa Partia Demokratike mbetet në vetëm 15.73%.
Ky zhvillim i ka zbehur ndjeshëm shanset e PD-së për të ruajtur mandatin e katërt, ndërsa në skenë është futur edhe një rrezik tjetër për opozitën tradicionale: Nisma Shqipëria Bëhet, e drejtuar nga Adriatik Lapaj, ka arritur 11.8% të votave të Diasporës në Vlorë. Po ashtu, edhe Partia Mundësia ka dalë mbi pritshmëritë me 7.36%.
Me këtë ritëm, nuk përjashtohet mundësia që mandati i nëntë i socialistëve të sfidohet nga një forcë e re si NSHB, nëse trendi i votave të Diasporës vijon me të njëjtën përqindje.
Aktualisht mbeten edhe mbi 11 mijë vota të Diasporës për t’u numëruar në qarkun e Vlorës, të cilat mund të kenë ndikim të drejtpërdrejtë në ndarjen përfundimtare të mandateve.
Kandidati që humbet mandatin nga radhët e PD është Altird Hoxha, pjesë e listës së mbyllur.
Lini një koment