News24, në bashkëpunim me kompaninë italiane Notosondaggi, ka publikuar projeksionin e fundit mbi ndarjen e mandateve në Qarkun e Vlorës për zgjedhjet e 11 majit. Sipas të dhënave të anketës, Partia Socialiste ruan një epërsi të qartë ndaj Partisë Demokratike, duke konfirmuar pozicionin dominues në këtë qark.
Sipas sondazhit, Partia Socialiste pritet të sigurojë nga 7 deri në 8 mandate, me një mbështetje prej rreth 54% të votuesve. Në krahun tjetër, Partia Demokratike parashikohet të fitojë nga 3 deri në 4 mandate, me një përkrahje që shkon në rreth 30.5%.
Ndërkohë, një mandat në Vlorë mund t’i shkojë Partisë Mundësia e drejtuar nga Agron Shehaj, e cila vlerësohet të ketë marrë rreth 7.5% të mbështetjes. Po ashtu, Nisma “Shqipëria Bëhet”, e udhëhequr nga Adriatik Lapaj dhe Endri Shabani, renditet në kufirin e 6% të votave, duke konkurruar për të siguruar një mandat.
Partitë e tjera në këtë qark mbeten në nivele të papërfillshme, me një mbështetje që vlerësohet rreth 0.5%, pa ndikuar ndjeshëm në ndarjen përfundimtare të mandateve.
Ky sondazh pasqyron prirjet aktuale të votuesve në një nga qarqet më të rëndësishme të vendit, vetëm pak ditë para mbajtjes së zgjedhjeve.
Lini një koment