Rezervimet mbi normën, Saranda pritet të shënojë rekord turistësh këtë vit

Saranda po përgatitet për një sezon turistik të suksesshëm, me tregues që dëshmojnë një rritje të ndjeshme të interesit nga turistët e huaj. Edhe pse sezoni veror ende nuk ka nisur zyrtarisht, qyteti ka filluar të tërheqë vizitorë nga vende të ndryshme, ndërsa rezervimet janë mbi mesataren dhe në rritje të vazhdueshme.

Kreu i Shoqatës së Operatorëve Turistikë të Sarandës, Arben Çipa, shprehet optimist për ecurinë e këtij viti, duke theksuar se qyteti po shndërrohet në një destinacion gjithnjë e më tërheqës për grupet turistike nga jashtë.

“Shenjat e para janë shumë premtuese. Një numër i konsiderueshëm turistësh grekë dhe francezë kanë nisur të vizitojnë Sarandën që në fillim të vitit, çka tregon se pritshmëritë për një sezon të suksesshëm janë të larta,” deklaroi Çipa.

Ai vuri në dukje rëndësinë e një menaxhimi të kujdesshëm të fluksit turistik, duke theksuar se sfidat e viteve të kaluara duhet të shërbejnë si mësim për të garantuar një përvojë më të mirë për vizitorët.

“Problemet me menaxhimin e trafikut dhe pastrimin e qytetit vitin e kaluar kanë dhënë mësime të vlefshme. Këtë vit, duhet të sigurohemi që këto çështje të adresohen që në fillim të sezonit, duke menaxhuar më mirë rrjedhën e makinave dhe duke garantuar një pastrim të rregullt të hapësirave publike,” shtoi ai.

Operatorët turistikë në Sarandë tashmë kanë nisur përgatitjet për të pritur një numër të lartë vizitorësh gjatë muajve të ardhshëm. Me një menaxhim të mirë dhe një angazhim të koordinuar mes autoriteteve dhe sektorit privat, pritshmëritë janë që sezoni i këtij viti të jetë ndër më të suksesshmit deri më tani./ Intervista e dhënë për Euronews Albania