Gjykata e Posaçme ka urdhëruar SPAK-un të regjistrojë procedim penal ndaj deputetes së Partisë Socialiste dhe ish-ministres së Jashtme, Olta Xhaçka, si dhe bashkëshortit të saj, Artan Gaçi. Vendimi është marrë pas një denoncimi të bërë nga eurodeputetit Fredi Beleri, i cili ka kërkuar hetime për çështjen e tjetërsimit të pronave në Himarë.
Pas kallëzimit të Belerit, SPAK nisi hetime për ish-kryebashkiakun e Himarës, Jorgo Goro, dhe disa zyrtarë të tjerë për të njëjtën çështje, duke i çuar ata në gjyq. Megjithatë, Xhaçka dhe Gaçi nuk ishin përfshirë fillimisht në proces. Pas këtij vendimi, tashmë SPAK është i detyruar të vijojë hetimet ndaj Xhaçkës dhe bashkëshortit për akuzat e shpërdorimit të detyrës, falsifikimit të dokumenteve dhe pastrimit të parave.
Sipas kallëzimit, bëhet fjalë për një pronë në Dhërmi, e cila pretendohet se është tjetërsuar në mënyrë të paligjshme dhe më pas është shitur tek Artan Gaçi. Në hetimet e mëparshme, SPAK ka vendosur të sekuestrojë këtë pronë.
Ndërkohë, më 13 mars, ish-kryebashkiaku Jorgo Goro u dënua me 2 vite e 20 ditë burg për shpërdorim detyre dhe mosdeklarim pasurie, si dhe iu ndalua për 5 vite ushtrimi i funksioneve publike.
Olta Xhaçka është aktualisht kanidate për zgjedhjet e 11 majit në listën e hapur të PS në Tiranë.
Lini një koment