“Harram e paçim po s’e mbrojtëm gjimnazin”- Qytetarët e Sarandës të premten në protestë kundër parkimit te “Hasan Tahsini”

Qytetarët e Sarandës kanë paralajmëruar një protestë kundër projektit për ndërtimin e një parkimi publik në territorin e gjimnazit “Hasan Tahsini”. Protesta do të zhvillohet të premten, më 14 gusht, në orën 09:00, përpara Bashkisë së Sarandës.

Aktivistja Aneta Xhiku u ka bërë thirrje qytetarëve të marrin pjesë dhe të kundërshtojnë projektin.

Xhiku e cilëson gjimnazin “Hasan Tahsini” një simbol të dijes në qytet dhe shprehet se hapësira, së bashku me terrenet sportive, duhet t’u trashëgohet brezave të ardhshëm dhe jo të kthehet në parkim.

“Harram e paçim dijen që na kanë dhënë mësuesit dhe prindërit tanë nëse ne e lejojmë parkimin”, thotë Xhiku.

Thirrja për protestë vjen pas vendimit që Këshilli Bashkiak i Sarandës, miratoi më 4 gusht, i cili i hap rrugë ndërtimit të një parkimi publik në sipërfaqen e gjimnazit “Hasan Tahsini”. Vendimi u miratua me votat e këshilltarëve të mazhorancës, ndërsa një pjesë e këshilltarëve të opozitës u larguan nga salla.

Projekti ka shkaktuar reagime të shumta edhe në rrjetet sociale, ku qytetarë të Sarandës kanë shprehur kundërshtimin ndaj përdorimit të kësaj hapësire për parkim.