Prokuroria e Tiranës ka paraqitur konkluzionet përfundimtare në gjyqin ndaj dy të pandehurve për vrasjen e biznesmenit Edmond Papa, i cili u ekzekutua më 16 dhjetor 2022 në zonën e Selitës, në rrugën “Fadil Bodinaku”, në kryeqytet.
Për Andrew Bode, i dyshuar si autor i drejtpërdrejtë i ekzekutimit të 49-vjeçarit, organi i akuzës ka kërkuar dënimin me 30 vite burg. Ai akuzohet për veprat penale “vrasje me paramendim” kryer në bashkëpunim dhe “mbajtje pa leje e armëve”.
Ndërkohë, për bashkëpunëtorin e dyshuar, Alban Velo, i arrestuar pak ditë pas ngjarjes, Prokuroria ka kërkuar dënim me 25 vite heqje lirie, për të njëjtën akuzë të “vrasjes me paramendim” në bashkëpunim.
Prokurori i çështjes, Albert Kuliçi, kërkoi që të dy të pandehurit të vuajnë dënimin në një institucion të sigurisë së lartë, duke theksuar rrezikshmërinë që ata paraqesin për shoqërinë.
Ngjarja e rëndë ndodhi në mes të ditës, kur autorët qëlluan në drejtim të biznesmenit me nëntë plumba, duke i shkaktuar atij plagë të rënda që i morën jetën gjatë transportimit për në spital. Autorët u larguan menjëherë nga vendi i krimit.
Edmond Papa rezultonte me precedentë penalë në Greqi, ku ishte dënuar për trafik droge, si dhe kishte qenë i skeduar më herët në Britaninë e Madhe. Ai ishte pronar i hotelit “Blue Sky” në qytetin e Sarandës.
Hetimet zbuluan se motivi i vrasjes kishte lidhje me hakmarrjen, ndërsa çështja u zbardh brenda pak javësh nga autoritetet.
Lini një koment