Policia e Sarandës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Sarandë, ka finalizuar operacionin policor të koduar “Silent Crossing”, duke goditur një rast të trafikut të paligjshëm të mjeteve lundruese nga Greqia në Shqipëri.
Operacioni nisi pas një kallëzimi të paraqitur nga një shtetas grek, i cili denoncoi se gjatë natës së 28 qershorit 2025, në ishullin e Korfuzit, i ishin vjedhur dy mjete lundruese – një gomone dhe një skaf. Sipas kallëzimit, ai dyshonte se mjetet ishin trafikuar në territorin shqiptar.
Si rezultat i hetimeve dhe veprimeve operacionale, u arrestua në flagrancë shtetasi D. D., 23 vjeç, banues në Gjashtë, Sarandë. Ndërkohë, janë shpallur në kërkim tre shtetas të tjerë: D. J., 48 vjeç, dhe A. J., 24 vjeç, të dy banues në Sarandë, si dhe A. K., 48 vjeç, banues në Tepelenë.
Hetimet paraprake treguan se katër të dyshuarit kishin organizuar vjedhjen e dy mjeteve lundruese në Korfuz, të cilat më pas i kishin transportuar në qytetin e Sarandës. Gjatë kontrolleve të ushtruara nga Policia, njëri prej mjeteve të trafikuara u gjet i fshehur në një parcelë në fshatin Vrion, Finiq, dhe u sekuestrua në cilësinë e provës materiale, së bashku me një kamion të dyshuar si mjet transporti për zhvendosjen e gomones nga bregdeti drejt parcelës.
Policia bën me dije se hetimet po vijojnë për kapjen e të shpallurve në kërkim dhe për identifikimin e personave të tjerë të përfshirë në këtë veprimtari kriminale.
Materialet procedurale i janë referuar Prokurorisë për veprime të mëtejshme.
Lini një koment