Një akt i rëndë vandalizmi ka tronditur fshatin Vrion në bashkinë Finiq, ku një varr është dhunuar nga persona ende të paidentifikuar. Ngjarja e rëndë është denoncuar menjëherë pranë autoriteteve policore, ndërsa banorët e zonës shprehen të tronditur dhe të indinjuar nga ky veprim, të cilin e konsiderojnë një fyerje të hapur ndaj kujtimit të të ndjerit dhe familjarëve të tij.
Sipas të dhënave paraprake, varri është dëmtuar qëllimisht, me shenja të dukshme vandalizmi që kanë shkaktuar reagime të forta në komunitet. Ende nuk dihet nëse ky veprim ka qenë i motivuar nga konflikte personale, urrejtje etnike ose fetare, apo nëse bëhet fjalë për një akt të pastër shkatërrimi nga individë të papërgjegjshëm. Policia ka nisur hetimet për të zbardhur rrethanat e ngjarjes dhe për të identifikuar autorët, ndërsa deri më tani nuk raportohet për persona të ndaluar apo të arrestuar.
Ngjarja ka ngritur shqetësim në mesin e banorëve të zonës, të cilët kërkojnë reagim të menjëhershëm nga autoritetet për të garantuar zbardhjen e plotë të rastit dhe për të vënë përgjegjësit përpara drejtësisë. Sipas tyre, veprime të tilla jo vetëm që cenojnë rëndë ndjenjat e familjarëve, por janë edhe një shkelje e rëndë e normave shoqërore dhe njerëzore që lidhen me respektin ndaj të vdekurve.
Autoritetet policore nga ana tjetër kanë theksuar se po punojnë për grumbullimin e provave në vendngjarje dhe se hetimet do të përqendrohen edhe në gjurmimin e çdo kamere sigurie apo dëshmie që mund të ndihmojë në zbardhjen e këtij akti.
Lini një koment