Vendosën zjarrin që për pak dogji fshatin, dy të arrestuar në Leshnicë të Finiqit

Policia e Sarandës ka vënë në pranga dy shtetas, të cilët dyshohet se ndezën zjarr në një sipërfaqe toke në fshatin Leshnicë e Poshtme, në Bashkinë Finiq, duke shkaktuar djegien e rreth 450 m² me bimësi dhe pemë frutore.

Të arrestuarit janë shtetasit P. G., 55 vjeçe, banuese në Sarandë, dhe I. R., 53 vjeç, banues në Finiq. Sipas të dhënave zyrtare, ngjarja ka ndodhur më datë 5 korrik rreth orës 12:00, dhe dyshohet se zjarri është vënë me qëllim dhe jo aksidentalisht.

Shërbimet e Komisariatit të Policisë Sarandë ndërhynë menjëherë për lokalizimin e autorëve dhe bënë arrestimin e tyre në flagrancë. Materialet procedurale në ngarkim të tyre i janë referuar Prokurorisë pranë Gjykatës së Shkallës së Parë Sarandë, për veprën penale “Shkatërrimi i pronës me zjarr”, e kryer në bashkëpunim.

Policia apelon qytetarët të shmangin zjarrvëniet e qëllimshme apo nga pakujdesia, pasi përveçse dëmtojnë mjedisin dhe pronën, përbëjnë rrezik për jetën dhe ndëshkohen sipas ligjit. Çdo rast i tillë mund të denoncohet në numrin pa pagesë 112, me garanci për anonimatin dhe reagim të menjëhershëm.