Një konflikt mes dy personave ka përfunduar me plagosjen e një 44-vjeçari mbrëmjen e djeshme në rrugën “Mitat Hoxha” në Sarandë. Policia bën me dije se shtetasi Klodjan Basholli, 44 vjeç, banues në Shijan të Delvinës, ka mbetur i plagosur me thikë pas një sherri me 26-vjeçarin Elvis Ndoji, banues në Sarandë.
I plagosuri është transportuar menjëherë në Spitalin e Sarandës, ku ka marrë ndihmën mjekësore. Ndërkohë, autori i dyshuar i ngjarjes është identifikuar dhe lokalizuar nga policia, dhe pas disa orësh është vetëdorëzuar pranë uniformave blu.
Të dy personat e përfshirë në këtë konflikt rezultojnë me precedentë penalë. Klodjan Basholli është dënuar më parë nga Gjykata e Krimeve të Rënda me 5 vite e 4 muaj burg për trafik ndërkombëtar droge. Në vitin 2008, ai u kap me një skaf që transportonte 278 kilogramë marijuanë në plazhin e Manastirit. Gjithashtu, në vitin 2017 u arrestua si pjesë e një grupi të dyshuar për vjedhje në fshatrat kufitare greke, ku gjatë operacionit u sekuestruan edhe dy armë zjarri.
Nga ana tjetër, Elvis Ndoji ka qenë arrestuar në tetor të vitit 2024 për disa vjedhje, ndërsa gjatë kontrollit të policisë iu gjetën një thikë dhe një sopatë. Nuk dihet ende se në çfarë rrethanash ai ka dalë i lirë.
Policia e Sarandës vijon hetimet për zbardhjen e plotë të shkaqeve që çuan në përplasjen mes dy të rinjve me të kaluar kriminale.
Lini një koment