Deputetja e Partisë Demokratike, Ina Zhupa, ka ngritur alarmin për situatën e sigurisë në qytetin bregdetar të Sarandës. Përmes një deklarate për media këtë të martë, Zhupa tha se vetëm gjatë gjashtë ditëve të fundit janë regjistruar katër ngjarje të rënda kriminale, duke krijuar pasiguri te banorët dhe pushuesit në kulmin e sezonit turistik.
“Saranda është kthyer në një qytet arenë të përplasjeve kriminale dhe të hesapeve të vjetra, ndërsa policia duket se është me pushime. Persona të armatosur apo në kërkim lëvizin lirshëm në qytet, ndërkohë që shteti vijon të qëndrojë pasiv,” deklaroi deputetja e PD-së.
Zhupa renditi disa nga ngjarjet e fundit kriminale që kanë tronditur qytetin: më 17 korrik dy grupe u përplasën me armë zjarri në lagjen nr. 4, në mes të ditës dhe në sy të pushuesve. Më 19 korrik, në Ksamil, pronari i një hoteli u dhunua me sende të forta. Vetëm një ditë më vonë, më 20 korrik, pati të shtëna me armë zjarri në rrugën “Mitat Hoxha” ku mbeti i plagosur një ish-polic, ndërsa mbrëmjen e 21 korrikut një shpërthim tritoli goditi lagjen nr. 3.
“Katër ngjarje të tilla në vetëm gjashtë ditë tregojnë një gjendje të jashtëzakonshme. Është krijuar një klimë frike te qytetarët, ndërsa lajmet për krime pothuajse të përditshme po dëmtojnë rëndë edhe turizmin,” shtoi Zhupa.
Ajo i bëri thirrje Ministrit të Brendshëm dhe Drejtorit të Përgjithshëm të Policisë të marrin masa urgjente për të rikthyer rendin dhe sigurinë në qytet.
“Policia ka për detyrë të parandalojë krimet dhe të garantojë jetën e qytetarëve, jo të numërojë viktimat dhe të plagosurit pasi ndodhin ngjarjet. Mos e përdorni policinë për të hequr vazot e luleve nga baret e hapura, por për të siguruar qytetarët,” tha Zhupa.
Lini një koment