Përfaqësues të Ministrisë së Brendshme së bashku me drejtues të lartë të Drejtorisë së Policisë së Qarkut Vlorë kanë mbërritur në Komisariatin e Sarandës për të zhvilluar një mbledhje urgjente me drejtuesit lokalë. Në fokus të takimit ishte analiza e situatës së sigurisë pas ngjarjeve të fundit në Sarandë dhe Ksamil.
Në kuadër të operacioneve për forcimin e rendit, gjatë orëve të para të mëngjesit forcat RENEA, në bashkëpunim me FNSH dhe repartin “Shqiponja”, kanë kryer kontrolle të gjera nga toka dhe deti në një sipërfaqe të madhe, përfshirë zona malore, tunele dhe bunkerë të braktisur. Megjithatë, kontrollet nuk dhanë rezultate konkrete.
Operacionet vijojnë në terren, ndërsa forcat e policisë po vijojnë me kontrolle të tjera intensive në zonë. Autoritetet nënvizojnë angazhimin maksimal për garantimin e sigurisë së qytetarëve dhe kthimin e qetësisë në këtë rajon.
Ngjarjet e fundit kriminale që kanë tronditur Sarandën: më 17 korrik dy grupe u përplasën me armë zjarri në lagjen nr. 4, në mes të ditës dhe në sy të pushuesve. Më 19 korrik, në Ksamil, pronari i një hoteli u dhunua me sende të forta. Vetëm një ditë më vonë, më 20 korrik, pati të shtëna me armë zjarri në rrugën “Mitat Hoxha” ku mbeti i plagosur një ish-polic, ndërsa mbrëmjen e 21 korrikut një shpërthim tritoli goditi lagjen nr. 3.
Lini një koment