Thirrjet e kryeministrit Edi Rama për reforma në administratën publike dhe punësime përmes konkurseve duket se mbeten ende larg realitetit. Pavarësisht retorikës për “gjak të ri” në drejtimin e institucioneve, emërimet vazhdojnë të ndjekin të njëjtat skema të vjetra. Shembulli më i fundit është ai i Admir Malajt, i cili është emëruar drejtor i ri i Portit të Sarandës.
Malaj, i cili deri para pak kohësh drejtonte Portin e Vlorës dhe mbante postin e kryetarit të Partisë Socialiste në këtë qytet, u largua nga drejtimi i PS-së në prag të zgjedhjeve vendore të 11 majit. Sipas burimeve, largimi i tij erdhi pasi u konsiderua pengesë për prurjet e reja në parti, sidomos nga radhët e Partisë Demokratike.
Pas përfundimit të zgjedhjeve, Malaj është transferuar në krye të Portit të Sarandës, duke zëvendësuar Alket Qëndron. Ky i fundit, mësohet se është telefonuar personalisht nga kryeministri Rama, i cili i kërkoi dorëheqjen.
Burime pranë administratës bëjnë me dije se emërimi i Malajt është favorizuar edhe nga marrëdhëniet e tij të afërta me ministrin Pirro Vëngu. Kritikat ndaj procesit nënvizojnë se vendimet për drejtuesit e institucioneve mbeten të paracaktuara dhe se konkurset e premtuara nga qeveria nuk kanë asnjë vlerë reale.
Ky rast ka risjellë në vëmendje zhgënjimin e qytetarëve që dorëzojnë CV-të e tyre me bindjen se do të vlerësohen mbi baza meritokracie, ndërkohë që emërimet vijojnë t’u besohen njerëzve të afërt me pushtetin.
Lini një koment