Shefi i Komisariatit të Delvinës, komisar Agim Troci, është transportuar me helikopter drejt Spitalit të Traumës në Tiranë, pas plagëve të marra gjatë përpjekjeve për të ndihmuar në shuarjen e zjarrit në fshatin Senicë. Ai ka pësuar djegie në bark, krah dhe këmbë.
Fillimisht, Troci mori ndihmën e parë në spitalin e Sarandës, por për shkak të gjendjes së rënduar u vendos transportimi i tij drejt Tiranës me helikopter, ku do të trajtohet në Spitalin e Traumës.
Ndërkohë, situata në terren nga zjarret mbetet kritike. Ministria e Mbrojtjes ka urdhëruar evakuimin e menjëhershëm të banorëve në fshatrat Palavli, Vergo dhe Kopaçëz, në bashkinë Delvinë, për shkak të rrezikut të shtuar nga zjarret që po përhapen me shpejtësi.
Përmes strukturave të Mbrojtjes Civile, u është bërë thirrje banorëve të respektojnë udhëzimet e emergjencave civile dhe të bashkëpunojnë me forcat e Policisë dhe autoritetet vendore për të garantuar sigurinë e tyre dhe të pronës.
Lini një koment