U fut në det me miqtë, zhduket turisti portoguez në Sarandë

Një turist portugez është zhdukur pasditen e kësaj të diele në ujërat pranë “Bukës së Vivarit”, në Sarandë, ndërsa po notonte me miqtë e tij.

Sipas informacioneve paraprake të dhëna nga policia, ngjarja është  raportuar rreth orës 18:00, kur shtetasi A. G., 57 vjeç, me shtetësi portugeze, ka hyrë në det dhe nuk është rikthyer më. Miqtë e tij kanë njoftuar menjëherë autoritetet pasi humbën kontaktin me të.

Shërbimet e Policisë Kufitare dhe ato të Komisariatit të Sarandës kanë nisur menjëherë kërkimet nga toka dhe deti, ndërkohë që në vendngjarje ndodhet edhe një grup hetimor që po punon për të zbardhur rrethanat e plota të zhdukjes.

Për momentin, kërkimet janë përqendruar në zonën pranë lagunës, ku dyshohet se turisti mund të jetë fundosur ose të jetë tërhequr nga rrymat detare.