Një Jet Ski është bllokuar nga Policia Kufitare e Sarandës, pasi u konstatua duke lëvizur brenda perimetrit të sigurisë së pushuesve në Ksamil, duke rrezikuar sigurinë e tyre.
Ndërhyrja erdhi pas një ankese të bërë në portalin e bashkëqeverisjes, ku denoncohej prania e mjetit lundrues në zonën e ndaluar. Pamjet e ngjarjes u publikuan më pas edhe në rrjetet sociale.
Pas verifikimeve, Policia Kufitare identifikoi pronarin e mjetit, shtetasin S. D., ndaj të cilit u vendos një gjobë administrative prej 100 mijë lekësh, në bazë të nenit 24/1/c të Ligjit nr. 43/2020, që ndalon lundrimin në zonat e sigurisë për pushuesit. Mjeti lundrues u sekuestrua.
Policia Kufitare u bën thirrje përdoruesve të mjeteve lundruese të respektojnë me përpikëri rregullat dhe zonat e përcaktuara për lundrim, duke shmangur çdo rrezik për pushuesit. Qytetarët ftohen të raportojnë çdo shkelje në numrin 112, me garanci për reagim të menjëhershëm.
Lini një koment