Një ngjarje e rëndë u shënua pasditen e së dielës në Sarandë, ku një konflikt për parkimin e automjeteve përfundoi me plagosjen e rëndë të një nëne dhe djalit të saj.
Sipas policisë, ngjarja ndodhi rreth orës 17:45 në lagjen nr. 4, ku në konflikt u përfshinë të paktën gjashtë persona. Vëllezërit Romeo dhe Fabion Laze, pronarë të një lavazhi, goditën me grushte, shkopinj dhe sende të forta shtetasit N. A. dhe E. A., duke u shkaktuar dëmtime serioze. Të plagosurit u transportuan menjëherë me autoambulancë drejt Spitalit të Sarandës dhe ndodhen jashtë rrezikut për jetën.
Policia shoqëroi fillimisht katër persona, ndërsa pas hetimeve arrestoi në flagrancë dy vëllezërit Laze për veprën penale “Plagosje e rëndë me dashje në bashkëpunim”.
Të dy të arrestuarit janë persona me precedentë penalë. Në vitin 2011, ata u akuzuan për plagosje me sende të forta, ndërsa vite më pas u proceduan për trafikim narkotikësh dhe dhunë në familje. Në gusht 2021, Romeo Laze u arrestua për “prodhim dhe shitje të lëndëve narkotike”, ndërsa në shkurt 2025 Prokuroria e Sarandës sekuestroi pasuri, automjete dhe një biznes në pronësi të tij. Fabion Laze, nga ana tjetër, rezulton i hetuar për veprimtari të ngjashme edhe jashtë vendit.
Hetimet vijojnë për të zbardhur plotësisht rrethanat e ngjarjes.
Lini një koment