Aksident i rëndë në Sarandë: Automjeti përplaset me shtyllën elektrike, shoferi “tapë” në timon

Një aksident i rëndë ka ndodhur në orët e para të mëngjesit të së shtunës, rreth orës 04:00, në rrugën “Butrinti” në qytetin e Sarandës.

Sipas informacioneve paraprake, një automjet tip me targa AB057PX, i drejtuar nga shtetasi Adriatik Bino, ka humbur kontrollin dhe është përplasur me një shtyllë elektrike, duke shkaktuar rrëzimin e saj në mes të rrugës.

Fatmirësisht, nga aksidenti nuk ka të lënduar në njerëz, por janë regjistruar dëme të konsiderueshme materiale. Në momentin e ngjarjes, rruga ishte e zbrazët nga kalimtarët, çka ka shmangur pasojë më të rënda për sigurinë publike.

Në vendngjarje kanë mbërritur menjëherë shërbimet e Qarkullimit Rrugor, të cilat kanë kryer veprimet e para hetimore. Gjatë kontrollit të mjetit dhe testit të alkoolit, drejtuesi rezultoi pozitiv: në testin e parë u konstatua një nivel prej 1.1 mg/l, ndërsa në testin e dytë 1.28 mg/l, çka tregon se ndodhej në gjendje të dehur në momentin e aksidentit.

Policia po vijon me veprimet e mëtejshme proceduriale për zbardhjen e plotë të rrethanave të ngjarjes.