Një aksion i Byrosë Kombëtare të Hetimit është zhvilluar të mërkurën që lamë pas në Sarandë, ku agjentët kanë kryer kontrolle në disa ambiente që lidhen me zv.kryetarin e Bashkisë së Sarandës, Elton Dauti, dhe ortakun e tij, Kostandin Papa.
Kontrollet kanë nisur rreth orës 07:30 të mëngjesit, kur agjentët e BKH-së janë paraqitur në banesën e Dautit për të ushtruar verifikime. Më pas, veprimet hetimore janë shtrirë edhe në ambientet e kompanisë “Eco Taxi”, në pronësi të Elton Dautit dhe Kostandin Papës, si dhe në ambiente të tjera që lidhen me aktivitetin e tyre.
Në fokus të hetimeve nuk është vetëm aktiviteti i transportit me taksi, por edhe veprimtaria e trenave turistikë në zonën e Syrit të Kaltër, një prej destinacioneve më të vizituara në jug të vendit. Hetimet lidhen gjithashtu me lejen e dhënë për ushtrimin e këtij aktiviteti nga ministrja e Turizmit, Mirela Kumbaro, e cila tashmë është vënë në lupën e hetuesve.
Deri më tani, nuk ka një informacion zyrtar mbi rezultatet e kontrolleve apo personat ndaj të cilëve mund të shtrihen veprimet e mëtejshme hetimore./Publik.al
Lini një koment