Gangsterët e Ksamilit rrahin punonjësit e ujësjellësit, policia i liron! Prokuroria hesht!

Një ngjarje e rëndë është shënuar pasditen e së martës, rreth orës 15:00, në qytetin e Ksamilit, ku një biznesmen lokal, i identifikuar si Çlirim Koburi, ka ushtruar dhunë fizike ndaj disa punonjësve të Ujësjellës Kanalizime Sarandë, të cilët ndodheshin në terren për të riparuar një defekt në rrjetin kryesor të ujësjellësit.

Sipas burimeve për “Saranda Online”, punonjësit u sulmuan barbarisht nga pronari i hotelit në Ksamil, ndërkohë që ishin duke kryer punën e tyre në temperatura të larta, për të garantuar furnizimin me ujë të pijshëm për banorët dhe turistët.

Menjëherë pas incidentit, policia mbërriti në vendngjarje dhe shoqëroi biznesmenin në komisariatin e Sarandës. Në njoftimin zyrtar, policia deklaroi se ka referuar materialet në prokurori, por vetëm pak orë më vonë, Koburi është liruar, duke ngritur dyshime të forta për ndërhyrje ose trajtim preferencial nga organet ligjzbatuese.

Ndërkohë, janë proceduar penalisht edhe punonjësit e dhunuar, çka e bën edhe më të paqartë dhe të dyshimtë mënyrën e trajtimit të kësaj ngjarjeje nga autoritetet.

Ky rast ka shkaktuar reagime të forta publike, duke ngritur pyetje serioze mbi barazinë para ligjit:

Çfarë do të ndodhte nëse i njëjti akt dhune do të ishte ushtruar ndaj punonjësve të policisë?

A do të lirohej kaq shpejt një qytetar i zakonshëm nëse do të godiste punonjës shteti gjatë ushtrimit të detyrës?

A kemi të bëjmë me favorizim për shkak të pushtetit ekonomik?

A kemi të bëjmë me një rast të pastër korrupsioni institucional?

Ky incident ngre shqetësime serioze për sigurinë e punonjësve të shërbimeve publike, të cilët, për një pagë minimale, ekspozohen jo vetëm ndaj kushteve të vështira të punës, por edhe ndaj dhunës fizike.

Prokuroria e Sarandës ka detyrimin ligjor dhe moral të hetojë ngjarjen me objektivitet dhe transparencë, duke vendosur përpara drejtësisë autorët e dhunës dhe duke mbrojtur integritetin e punonjësve të shtetit.

Projektorët janë tashmë mbi prokurorinë nëse ajo do të bëhet palë me gangsterët që ngrenë dorë mbi punonjësit e shtetit, apo nëse do të respektojë me integritet ligjin.