Një situatë kaotike është krijuar prej disa ditësh në pikën kufitare të Qafë-Botës, ku qytetarët që udhëtojnë nga Greqia drejt Shqipërisë, ose anasjelltas, janë përballur me radhë të gjata dhe pritje disa orëshe, për shkak të mungesës së stafit doganor nga pala greke.
Aktualisht, autoritetet greke operojnë me vetëm dy sportele dhe tre doganierë të sjellë nga Dogana e Kakavijës, ndërsa pala shqiptare funksionon me tre sportele për të përballuar fluksin e madh të udhëtarëve, teksa jemi në kulmin e sezonit turistik.
Kaosi është krijuar si pasojë e arrestimit të 14 doganierëve grekë, përfshirë edhe shefin e Doganës së Qafë Botës. Ata dyshohen të jenë pjesë e një grupi të organizuar kriminal, të akuzuar për “ryshfet pasiv në bashkëpunim” dhe shmangie të kontrolleve doganore kundrejt përfitimeve financiare.
Sipas autoriteteve greke, hetimi voluminoz ka zbuluar një skemë korruptive, duke sekuestruar mbi 2,000 faqe dokumentacion, materiale video, fotografi dhe biseda të përgjuara midis doganierëve dhe bashkëpunëtorëve të tyre.
Në anën shqiptare, autoritetet kufitare po punojnë për të lehtësuar fluksin dhe për të shmangur bllokimin e plotë të qarkullimit, ndërkohë që pritet normalizimi i situatës sapo pala greke të riorganizojë stafin doganor.
Lini një koment