Një ngjarje e rëndë është shënuar këtë pasdite në ambientet e Prokurorisë së Sarandës. Burime bëjnë me dije se një prokurore pranë Gjykatës së Shkallës së Parë është kërcënuar brenda zyrës së saj nga dy gra, të cilat janë të afërme të një të miture ndaj së cilës ishte vendosur masa e sigurisë “arrest në shtëpi”.
Sipas informacioneve paraprake, dy shtetaset janë paraqitur në Prokurori dhe kanë kërkuar takim me prokuroren që kishte firmosur masën e sigurisë. Gjatë bisedës, ato kanë shfaqur pakënaqësi për vendimin dhe më pas kanë kaluar në fyerje dhe kërcënime.
Pas ngjarjes është njoftuar menjëherë Policia e Sarandës, e cila ka ndërhyrë dhe ka shoqëruar dy gratë në komisariat. Ato po hetohen për veprën penale “Kanosje e gjyqtarit”, e parashikuar në Kodin Penal.
Pamjet filmike të kamerave të sigurisë së institucionit, tashmë të sekuestruara nga autoritetet, do të shërbejnë si prova kryesore në hetim.
Lini një koment