Një konflikt i ashpër për shfrytëzimin e një hapësire plazhi në Ksamil ka përfunduar me dhunë fizike dhe plagosjen e një biznesmeni këtë të shtunë. Ngjarja e rëndë ndodhi mes dy pronarëve lokalë, Albert Pashaj, pronari i “Euro Hotel Ksamil”, dhe Agim Taraj, pronar i “Sunset Beach Bar”.
Pamjet e siguruara nga vendngjarja tregojnë momentet pas incidentit, ku Pashaj shfaqet i gjakosur në kokë, teksa ndodhej në plazh së bashku me familjen. Në video shihet edhe një person që largohet me vrap, për të cilin familjarët e të plagosurit pretendojnë se është autori i goditjeve.
Policia ka reaguar menjëherë, duke shoqëruar Agim Taraj dhe duke nisur hetimet për zbardhjen e plotë të ngjarjes. Burime pranë uniformave blu bëjnë me dije se janë identifikuar edhe persona të tjerë të dyshuar si të përfshirë në përplasjen fizike, të cilët pritet të merren në pyetje.
Sipas informacioneve, hapësira e plazhit ka qenë për disa vite në administrim nga “Sunset Beach Bar”. Megjithatë, këtë sezon një pjesë e saj është kaluar në përdorim të hotelit fqinj, duke ngjallur përplasje të vazhdueshme mes dy pronarëve. Autoritetet lokale, për të shmangur tensionet, e kanë shpallur zonën si hapësirë publike, por kjo nuk ka mjaftuar për të qetësuar situatën.
Lini një koment