Drejtoria Vendore e Policisë Vlorë njoftoi se, falë bashkëpunimit mes Komisariatit të Policisë Sarandë dhe Komisariatit Nr. 2 në Tiranë, është bërë e mundur kapja dhe ndalimi i shtetasit O. L., 22 vjeç, i shpallur më herët në kërkim.
I riu u ndalua pas vendimit të Gjykatës së Shkallës së Parë të Juridiksionit të Përgjithshëm Sarandë, e cila kishte caktuar ndaj tij masën e sigurisë “arrest në burg”, për veprën penale “Prodhimi dhe shitja e narkotikëve”.
Gjithashtu, të njëjtët specialistë për hetimin e krimeve referuan materialet në Prokurori dhe nisën procedim penal për dy shtetas të tjerë:
– A. E., 24 vjeç, banues në fshatin Berdenesh, Sarandë, pasi më datë 24.05.2025, në Ksamil, ka goditur me grushte dhe sende të forta një 53-vjeçar, shtetasin A. Ll., për motive të dobëta.
– A. M., 48 vjeç, banues në Sarandë, u procedua pasi u kap në flagrancë në lagjen nr. 1, Sarandë, duke hedhur materiale inerte (gurë) në stacionin e plazhit që kishte në përdorim, duke ndotur kështu mjedisin.
Policia njofton se hetimet për të tre rastet vijojnë, ndërsa materialet përkatëse i janë referuar Prokurorisë pranë Gjykatës së Juridiksionit të Përgjithshëm Sarandë për veprime të mëtejshme.
Lini një koment