Ka përfunduar procesi i numërimit të votave në Bashkinë e Sarandës, pjesë e qarkut Vlorë, ku Partia Socialiste ka arritur një fitore të qartë përballë opozitës. Sipas të dhënave zyrtare të Komisionit Qendror të Zgjedhjeve (KQZ), PS ka siguruar 7,957 vota, duke lënë pas Koalicionin Partia Demokratike – Aleanca për Shqipërinë Madhështore me 3,725 vota.
Surpriza e këtyre zgjedhjeve në Sarandë ka qenë renditja e Koalicionit Nisma Shqipëria Bëhet, i drejtuar nga Adriatik Lapaj, që është pozicionuar si forcë e tretë me 1,462 vota, një rezultat i rëndësishëm për një subjekt të ri politik që konkuron për herë të parë në këto zgjedhje.
Në nivel qarku, Partia Socialiste ruan një avantazh të qartë, duke dalë forcë e parë në bashkitë Delvinë, Finiq, Himarë dhe Konispol. Procesi i numërimit vijon ende në bashkitë Vlorë dhe Selenicë, ku pritet të përcaktohet plotësisht ndarja e mandateve për qarkun. Aktualisht ndarja e mandateve është në nivelet 8 për partinë Socialiste, 4 për Partinë Demokratike.
Lini një koment