Debati mbi mungesën e avionëve zjarrfikës në Shqipëri është ndezur sërish pas shpërthimit të zjarreve në disa zona të vendit. Kryeministri Edi Rama, në vend që të japë një përgjigje të prerë përse vendi nuk ka investuar në këto mjete, ka zgjedhur ta relativizojë problemin duke thënë se zgjidhja është më komplekse se sa vetëm numri i avionëve.
“Ka shpërthyer një debat pse nuk blen Shqipëria avionë zjarrfikës, ndërkohë që ka ca llogari që duhen bërë dhe zjarret e ditëve të fundit nuk janë assesi çështje e një apo dy apo edhe tre avionësh! Dakord, mirë do ishte t’i kishim, por…”, deklaroi Rama.
Duke iu referuar situatës aktuale, ai shtoi se mjetet nga ajri janë shtuar këtë vit. “Kemi këto ditë mjete nga ajri më shumë se çdo vit më parë, falë flotës sonë dhe mbështetjes nga Mekanizmi Europian apo Emiratet e Bashkuara Arabe.”
Rama solli edhe shembullin e Greqisë për të cilën tha se ka 77 avionë zjarrfikës, por sërish vuan nga problemet e zjarreve.
“Po fqinjët tanë, Greqia dhe Italia apo Turqia dhe Spanja, që po përcëllohen më keq se ç’do vit tjetër, kanë vallë mungesë avionësh? Greqia ka një flotë ajrore totale prej 77 avionësh zjarrfikës; helikopterë janë pakashumë 20; automjete të tjera afërsisht 3,500 dhe zjarrfikëse të të gjitha llojeve e funksioneve.”- tha Rama.
Lini një koment