Eduart Mullaj, një 55-vjeçar shqiptar nga Delvina është plagosur me armë zjarri në orët e para të mëngjesit të kësaj të hëne në zonën e Patisias, në Athinë. Ngjarja ka ndodhur rreth orës 04:55, në kryqëzimin e rrugëve Vroutou dhe Themou Annino, në momentin kur shqiptari po dilte nga banesa e tij.
Sipas informacioneve paraprake, dy persona që lëviznin me një motoçikletë iu afruan 55-vjeçarit dhe hapën zjarr ndaj tij. Autorët u larguan menjëherë nga vendngjarja, ndërsa shqiptari mbeti i plagosur në gjymtyrët e poshtme dhe u transportua me ambulancë drejt spitalit “Georgios Gennimatas”. Gjendja e tij raportohet e qëndrueshme dhe jashtë rrezikut për jetën.
Në vendin e ngjarjes, policia greke gjeti dhe sekuestroi tre gëzhoja dhe një plumb, të cilat janë marrë si prova materiale në kuadër të hetimit. Autorët ende nuk janë identifikuar dhe vijojnë të jenë në kërkim.
Hetimet për zbardhjen e atentatit janë marrë përsipër nga Drejtoria e Krimit të Organizuar e Policisë së Atikës, e cila po punon për identifikimin e dy autorëve dhe përcaktimin e motivit të sulmit. Ndër pistat që po shqyrtohen është edhe mundësia e një konflikti të mëparshëm apo larjeje hesapesh, por deri tani motivi nuk është konfirmuar zyrtarisht.
Sipas policisë greke, i plagosuri është shprehur se dy personat që e qëlluan me armë, po tentonin të vidhin motorrin e tij dhe për këtë arsye hapën zjarr.
Megjithatë policia duket se nuk është e bindur me deklaratën e 55-vjeçarit dhe po heton edhe një ngjarje të 1 muaji me parë, kur pati të shtëna me armë zjarri në të njëjtin vend por pa të dëmtuar.
Lini një koment