Policia e Sarandës ka regjistruar disa ngjarje gjatë 24 orëve të fundit, që variojnë nga konflikte për motive pronësie e personale, deri te një incident aksidental që ka përfunduar me plagosje.
Sipas njoftimit zyrtar nga Drejtoria Vendore e Policisë, janë referuar materialet në prokurori dhe kanë nisur procedimet penale për shtetasit:
- A. M., 48 vjeç, banues në Sarandë, dyshohet se gjatë një konflikti për motive pronësie ka kanosur me thikë një grua, shtetasen A. N.
- T. D., 28 vjeç, po ashtu banues në Sarandë, është proceduar për kanosje ndaj një tjetër shtetasi, për motive të dobëta.
- Në Ksamil, tre gra, shtetaset E. M., 41 vjeçe, E. Ç., 18 vjeçe dhe S. M., 41 vjeçe, janë përfshirë në një konflikt fizik me njëra-tjetrën, gjithashtu për motive të dobëta.
Ndërkohë, më datë 9 qershor, është raportuar një ngjarje aksidentale në qytet, ku shtetasi P. B., 37 vjeç, është rrëzuar nga një mur rrethues pasi ka rënë në kontakt me rrymën elektrike. Ai është dërguar në spital dhe ndodhet jashtë rrezikut për jetën.
Policia bën me dije se të gjitha materialet procedurale janë referuar në Prokurorinë e Sarandës për veprime të mëtejshme.
Lini një koment