U përplas nga autobusi në aksin Sarandë-Delvinë, ndërron jetë 65-vjeçari

Ka humbur jetën Agim Vocka, 65 vjeçari nga fshati Bajkaj, i cili u aksidentua rëndë paraditen e të martës në aksin nacional Delvinë-Sarandë.

65-vjeçari u përplas nga një autobus pranë kthesës së fshatit Bajkaj dhe, pas aksidentit, u transportua me urgjencë në spitalin e Sarandës. Mjekët konstatuan se kishte pësuar traumë të rëndë në kokë, ndërsa për shkak të gjendjes së rënduar shëndetësore u vendos transportimi i tij me helikopter drejt Spitalit të Traumës në Tiranë.

Pavarësisht ndërhyrjes mjekësore dhe përpjekjeve për t’i shpëtuar jetën, 65-vjeçari nuk ka mundur t’u mbijetojë plagëve të marra dhe ka ndërruar jetë.