Një ngjarje e rëndë është regjistruar ditën e premte në lagjen nr. 2 të qytetit të Sarandës, ku një person ka grabitur një dyqan konfeksionesh nën kërcënimin e thikës dhe ka tentuar të përdhunojë shitësen 26-vjeçare.
Sipas Policisë, autori ka hyrë në dyqan dhe ka marrë një shumë prej 60.000 lekësh të reja nga arka, pasi ka kërcënuar shitësen 26-vjeçare me mjet prerës. Më pas, ai ka ushtruar dhunë fizike ndaj saj dhe dyshohet se ka tentuar të kryejë marrëdhënie seksuale me dhunë.
Policia ka identifikuar autorin e dyshuar si Jorgo Kumaraku, i njohur edhe si Leonard Kumaraku, 48 vjeç, banues në fshatin Livadhja të Bashkisë Finiq. Ai është shpallur në kërkim dhe konsiderohet person me rrezikshmëri të lartë për shkak të të kaluarës së tij kriminale.
Kumaraku është përdorues i lëndëve narkotike dhe ka një historik të pasur penal. Në vitin 2007 ai është dënuar me 5 vjet burg për grabitjen e punonjëses së një kazinoje në Sarandë me një armë lodër. Në vitin 2013, me të njëjtin modus operandi, kreu një tjetër grabitje në një kazino tjetër në qytet dhe një ditë më pas në një tjetër pikë në Gjirokastër.
Në vitin 2022 u dënua me 1 vit e 4 muaj burg për veprat penale “kanosje” dhe “mbajtje pa leje e armëve të ftohta”, pas një incidenti pranë një bankomati në Sarandë. Ndërkohë, në korrik 2023, ai u arrestua për vjedhje në një hotel në zonën e tij të banimit.
Kumaraku është gjithashtu i dënuar në Greqi për trafik të lëndëve narkotike.
Policia vijon kërkimet intensive për lokalizimin dhe arrestimin e tij, ndërsa 26-vjeçarja ndodhet nën trajtim mjekësor dhe psikologjik.
Lini një koment