Policia ka arrestuar 48-vjeçarin Jorgo Kumaraku, i njohur edhe si Leonard Kumaraku, i cili ditën e premte grabiti një dyqan në lagjen nr. 2 të qytetit të Sarandës dhe tentoi të përdhunonte, nën kërcënimin e thikës, shitësen 26-vjeçare.
48-vjeçari, një person me precedentë të rrezikshëm kriminalë, arriti të merrte 600 mijë lekë të vjetra nga dyqani.
Pas krimit, Kumaraku ishte larguar në drejtim të Durrësit, ku u arrestua nga forcat e policisë.
Materialet procedurale ndaj tij u referuan në Prokurorinë pranë Gjykatës së Shkallës së Parë të Juridiksionit të Përgjithshëm Sarandë.
“Ky shtetas dyshohet se më datë 02.05.2025, në një dyqan në lagjen nr. 2, Sarandë, nën kërcënimin e një mjeti prerës (thike), ka vjedhur me dhunë shumën prej 60.000 lekësh të reja nga shitësja 26-vjeçare, e cila si pasojë ka marrë dëmtime fizike. Gjithashtu, dyshohet se ka tentuar të kryejë marrëdhënie seksuale me dhunë ndaj saj.
Në vijim të veprimeve hetimore për këtë ngjarje, dhe pas shpalljes në kërkim të autorit të dyshuar, Policia e Sarandës, falë shkëmbimit të menjëhershëm të informacionit, në bashkëpunim me Komisariatin e Policisë Durrës, bëri të mundur lokalizimin, kapjen dhe ndalimin e këtij shtetasi në qytetin e Durrësit,” thuhet në njoftimin e policisë.
Kumaraku është përdorues i lëndëve narkotike dhe ka një historik të pasur penal. Në vitin 2007 ai është dënuar me 5 vjet burg për grabitjen e punonjëses së një kazinoje në Sarandë me një armë lodër. Në vitin 2013, me të njëjtin modus operandi, kreu një tjetër grabitje në një kazino tjetër në qytet dhe një ditë më pas, në një tjetër pikë në Gjirokastër.
Në vitin 2022, u dënua me 1 vit e 4 muaj burg për veprat penale “Kanosje” dhe “Mbajtje pa leje e armëve të ftohta”, pas një incidenti pranë një bankomati në Sarandë. Ndërkohë, në korrik të vitit 2023, ai u arrestua për vjedhje në një hotel në zonën e tij të banimit.
Kumaraku është gjithashtu i dënuar në Greqi për trafik të lëndëve narkotike.
Lini një koment