Pak ditë më parë, në rrjetet sociale dhe disa media online u përhap një lajm ku pretendohej se bashkëshorti i një punonjëse të Bashkisë kishte kallëzuar në polici se gruaja e tij e kishte tradhtuar me ish-kryetarin e Bashkisë së Tepelenës, Tërmet Peçi. Po ashtu, në disa raportime thuhej se ai kishte bërë kallëzim penal për përdhunim me kërcënim.
Sot ka ardhur reagimi i Elda Xhakollarit, gruaja e përfolur në këtë ngjarje, e cila ka mohuar në mënyrë kategorike çdo pretendim, duke e quajtur të gjithë historinë një shpifje të rëndë dhe sulm të organizuar ndaj saj dhe familjes.
Në reagimin e saj të plotë, Xhakollari deklaron:
“Fjalët më janë mbërthyer në shpirt, por tani duhet të dalin. Prej disa ditësh jam bërë subjekt lajmesh të pavërteta dhe shpifëse që kanë qarkulluar nëpër portale dhe rrjete sociale. Një situatë e thjeshtë pune është keqinterpretuar, është nxjerrë jashtë çdo konteksti dhe është kthyer në një histori që nuk ka lidhje me realitetin tim.
Ajo që më dhemb më shumë nuk është thjesht përmbajtja e këtyre lajmeve, por dëmi emocional që ka shkaktuar tek unë, familja ime dhe, mbi të gjitha, tek dy fëmijët e mi të mitur. Ata nuk e kuptojnë pse nëna e tyre përflitet, pse njerëzit flasin pa ditur asgjë, pse dikush shpif – por ata e ndiejnë gjithçka. Dhe kjo më copëton më shumë se çdo gjë tjetër.
Unë nuk po kërkoj mëshirë. Po kërkoj drejtësi dhe ndjeshmëri. Po kërkoj që njerëzit të mos gjykojnë pa ditur, të mos lëndojnë pa arsye dhe të mos shpërndajnë lajme që shkatërrojnë jetë të vërteta. Asgjë nga ajo që është thënë nuk është e vërtetë. Dhe çdo hap i nevojshëm ligjor është duke u ndërmarrë, jo për hakmarrje, por për të mbrojtur të vërtetën dhe për të thënë: MJAFTE MË!
Për më tepër, dua të theksoj qartë se: BASHKËSHORTI IM NUK KA BËRË ASNJËHERË DEKLARATAT QË THUHEN NËPËR MEDIA. Çdo fjalë që pretendohet se është thënë prej tij është trillim, dhe për këtë çështje do të ndiqen të gjitha rrugët penale dhe civile kundër autorëve të shkrimeve shpifëse, si dhe atyre që i kanë shpërndarë. Ky është një sulm i koordinuar, i ulët dhe i tmerrshëm jo vetëm ndaj meje si njeri, por edhe ndaj familjes sime dhe veçanërisht ndaj fëmijëve të mi të mitur, të cilët janë ekspozuar padrejtësisht ndaj kësaj dhune publike.
Nuk do të lejoj më askënd të më përdorë si “kavje” për t’u gjykuar nëpër portale që bëjnë “lajme” me kafe dhe komente në Facebook. Asnjë hap nuk do të mbetet pa u ndjekur. Dinjiteti im, puna ime dhe familja ime nuk janë për t’u prekur. Dhe çdo njeri që ka menduar të më godasë do të përballet me forcën e ligjit.
Ky nuk është vetëm një sulm ndaj meje si individ. Është një atentat ndaj të drejtës për privatësi, ndaj etikës, dhe mbi të gjitha, një përpjekje për të më gjykuar publikisht pa asnjë provë, në mungesë totale të së vërtetës. Familja ime është lënduar rëndë, dhe ky dëm nuk do të kalojë pa u trajtuar institucionalisht dhe ligjërisht.
Unë nuk do të hesht. Asnjë portal, asnjë komentues, asnjë njeri që mendon se mund të përdorë lirinë e fjalës si armë shpifjeje nuk do të mbetet pa përgjigje.
Dinjiteti im nuk është në shitje. E vërteta do të dalë, dhe drejtësia do të vihet në vend. Është shumë e lehtë ta gjykosh dikë pa ditur të vërtetën. Është shumë e lehtë të bësh “moralistin”. Është shumë e lehtë të shkruash dhe të shash pas atij telefoni… por nuk është aspak e lehtë të përballosh diçka të tillë. Po e bëj për fëmijët e mi, për dinjitetin tim dhe për çdo njeri që është gjykuar padrejtësisht në heshtje.
Ju lutem, në vend që të përhapni dhimbje, përhapni mirëkuptim. Përhapni kujdes. Shpifja nuk është lajm. Shpifja është dhunë!
Unë jam më shumë se një titull portali. Jam një nënë, një bijë, një njeri. E them me zë të plotë: gjithçka që është publikuar për mua është e pavërtetë. Një shpifje, një padrejtësi! Faleminderit nga zemra të gjithëve që më kanë qëndruar pranë me fjalë mbështetjeje e dashamirësie. Kjo gjë ka rëndësi më shumë se ç’mund të përshkruaj.
Kurse për atë pjesën tjetër që u gëzuan për dhimbjen e një femre, bije, nëne, iu them vetëm diçka: “Do vijë dita që do t’ju vijë turp nga vetja…”
Unë s’jam si ju. Dhe pse më vratë, nuk më bëni dot si vetja!”
Lini një koment