Në mbledhjen e zhvilluar këtë të premte, Këshilli Bashkiak i Sarandës miratoi me shumicë votash marrëveshjen e bashkëinvestimit mes Bashkisë dhe Fondit Shqiptar të Zhvillimit për projektin strategjik të quajtur “Poli i Zhvillimit Turistik”. Projekti prek një nga pronat më të debatueshme publike të qytetit: ish-“Rezidencën Qeveritare”, një sipërfaqe prej mbi 9,200 m² në një zonë me vlerë të lartë turistike.
Sipas marrëveshjes, në këtë truall do të ndërtohet një kompleks multifunksional që përfshin një pishinë publike, një restorant dhe një strukturë akomoduese për turistë. Projektuesit e paraqesin këtë projekt si një hap drejt uljes së papunësisë dhe krijimit të një urë të re mes arsimit profesional dhe sektorit të turizmit.
Por, detajet për menaxhimin e pronës publike pas kalimit të saj te FSHZH mbeten të paqarta. Nuk specifikohet nëse prona do të mbetet në përdorim publik, nëse hyrja në ambientet e reja do të jetë falas apo me pagesë, dhe as se kujt do t’i shkojnë përfitimet financiare të projektit.
Shqetësimet kryesore vijnë nga mungesa e transparencës dhe frika se prona publike mund të tjetërsohet në funksion të interesave të lidhura me pushtetin lokal apo qëndror. Përfaqësues të opozitës lokale dhe grupe qytetare kanë ngritur dyshime për qëllimet reale të projektit, duke e konsideruar atë një tjetërsim të pronës publike.
Në Këshilllin Bashkiak projekti u votua dhe nga dy këshilltarë të Partisë Lëvizja e Legalitetit. Kjo forcë politike ka mbajt një qëndrim publik dhe ka deklaruar përjashtimin e këshilltarëve që bashkuan votën me socialistët.
Në një deklaratë publike, PLL e cilësoi votën si një “tradhti ndaj elektoratit” dhe “përulje ndaj interesave klienteliste”.
Lini një koment