Gjykata e Shkallës së Parë të Juridiksionit të Përgjithshëm Sarandë ka vendosur të lërë në fuqi masën e sigurisë “arrest në burg” ndaj 21-vjeçar Orgest Lena, i cili ndodhet nën hetim për shitje të lëndëve narkotike një shtetaseje të mitur.
Sipas njoftimit zyrtar të Prokurorisë së Sarandës, procedimi penal është regjistruar më 18 maj 2025, Lena akuzohet për veprën penale “Prodhimi dhe shitja e narkotikëve”, parashikuar nga neni 283/1 i Kodit Penal.
Nga hetimet paraprake, rezulton se i dyshuari i ka shitur kokainë një shtetaseje të mitur, e cila më pas ka shfaqur probleme shëndetësore pas konsumimit të lëndës narkotike. Burime konfirmojnë se e mitura është vajza e një biznesmeni të njohur në fushën e turizmit në qytetin e Sarandës, çka e bën çështjen me interes të lartë publik.
Pas kërkesës së Prokurorisë për caktimin e masës së sigurisë, Gjykata vendosi më 19 maj “arrest në burg”, vendim që u ekzekutua më 26 maj në Tiranë nga strukturat e Policisë, ku 21-vjeçari u ndalua dhe u dërgua në paraburgim.
Më 27 maj, organi i akuzës paraqiti kërkesën për verifikimin dhe vijimin e masës, ndërsa në seancën e zhvilluar më 28 maj, Gjykata vendosi të lërë në fuqi masën e sigurisë, duke e mbajtur të riun në burg në pritje të hetimeve të mëtejshme.
Lini një koment