Qyteti i Sarandës është tronditur nga të shtënat me armë zjarri pasditen e kësaj të enjteje, ku dy persona mbetën të plagosur rëndë në afërsi të stadiumit.
Të plagosurit janë identifikuar si Ernest Lama, 24 vjeç, dhe Gëzim Hoxhaj, 32 vjeç, të dy nga Kamza. Sipas mjekëve të Spitalit Rajonal të Sarandës, ata kanë marrë plagë të rënda në bark dhe në zonën e legenit, dhe u transportuan me helikopter drejt Spitalit të Traumës në Tiranë për trajtim të specializuar.
Në vendngjarje janë gjetur katër gëzhoja pistolete, ndërsa forcat e policisë janë vënë menjëherë në ndjekje të autorëve të dyshuar. Ramadan Zoto (Canaj), 43 vjeç, dhe Erjon Canaj, 35 vjeç, vëllezër, janë identifkuar si autorët e ngjarjes.
Për kapjen e tyre, Policia e Shtetit ka angazhuar forcat e ndërhyrjes së shpejtë dhe njësitë e RENEA-s, të cilat kanë “blinduar” hyrje-daljet e Sarandës dhe po kryejnë kontrolle intensive në zonë. Grupi hetimor ndodhet në terren dhe po punon për zbardhjen e plotë të rrethanave të konfliktit që çoi në përplasjen me armë.
Lini një koment