Policia e Sarandës ka zbardhur ngjarjen e rëndë të ndodhur pasditen e së enjtes në një lokal pranë stadiumit, ku dy shtetas mbetën të plagosur pas të shtënave me armë zjarri.
Sipas burimeve zyrtare, janë shpallur në kërkim katër persona të përfshirë në konflikt: Erjon Canaj (36 vjeç), Artan Murtaj (43 vjeç), Klaus Jaçaj (31 vjeç) dhe Ramadan Zoti (43 vjeç). Ky i fundit dyshohet si autori i atentatit me armë zjarri ndaj dy të rinjve nga Tirana, Ernest Lama (25 vjeç) dhe Gëzim Hajdaraj (33 vjeç).
Një nga të plagosurit në pranga
Gjatë hetimeve, Policia ka arrestuar edhe Gëzim Hajdarajn, një nga të plagosurit, pasi gjatë kontrollit ndaj tij u gjet dhe u sekuestrua një armë zjarri tip “Beretta” me krehër dhe 9 fishekë. Hajdaraj akuzohet për veprën penale “Mbajtja pa leje e armëve dhe municioneve luftarake”.
Si ndodhi ngjarja
Hetimet paraprake tregojnë se konflikti mes palëve nisi për motive të dobëta dhe më pas degjeneroi në përdorim armësh. Ramadan Zoti dyshohet se ka qëlluar në drejtim të Hajdarajt dhe Lamës, duke i plagosur rëndë. Të dy ndodhen aktualisht në Spitalin e Traumës në Tiranë, nën kujdesin e mjekëve.
Në vendin e ngjarjes, grupi hetimor sekuestroi si prova materiale 4 gëzhoja arme zjarri, një pistoletë dhe municione.
Policia deklaron se vijon puna për lokalizimin dhe arrestimin e personave të shpallur në kërkim.
Lini një koment