Një shpërthim i fuqishëm me eksploziv ka tronditur lagjen nr.3 të qytetit të Sarandës. Sipas informacioneve paraprake, lënda eksplozive dyshohet se është vendosur pranë një automjeti, në afërsi të banesës së Klaus Jace, një shtetas i shpallur në kërkim nga policia.
Si pasojë e shpërthimit janë shkaktuar dëme të konsiderueshme materiale, si në automjet, ashtu edhe në banesën përreth. Fatmirësisht nuk raportohet për të lënduar. Forca të shumta policore ndodhen në vendngjarje, ndërsa zona është rrethuar dhe janë ngritur pika kontrolli në hyrje-daljet e qytetit për të shmangur lëvizjen e personave të dyshimtë.
Klaus Jace është shpallur në kërkim disa ditë më parë, pas një ngjarjeje të ndodhur pranë stadiumit të qytetit ku u plagosën me armë zjarri Ernest Lama, 25 vjeç dhe Gëzim Hajdaraj, 33 vjeç.
Së bashku me Jace-n, në kërkim janë edhe Ramadan Zoto, i dyshuar si autori i plagosjes, vëllai i tij Erjon Canaj, 36 vjeç dhe shtetasi Artan Murtaj, 43 vjeç. Hetuesit dyshojnë se shpërthimi i sotëm mund të jetë i lidhur me konfliktet kriminale që kanë përfshirë grupet rivale në qytet.
Grupet hetimore po punojnë për të identifikuar autorët dhe për të zbardhur motivet e kësaj ngjarjeje.
Lini një koment