Një ngjarje e rëndë është shënuar mbrëmjen e sotme në lagjen nr. 4 të qytetit të Sarandës, ku një konflikt mes disa personave ka përfunduar me plagosjen e një shtetasi.
Sipas informacioneve paraprake, rreth orës 19:10, në rrugën “Mitat Hoxha” ka ndodhur një sherr, ku janë përdorur mjete të forta, thika dhe armë zjarri. Në kulmin e konfliktit, njëri nga personat e përfshirë ka nxjerrë pistoletën, ka qëlluar fillimisht në ajër dhe më pas ka goditur me tytën e armës shtetasin Adil Veli, 54 vjeç, ish-efektiv i policisë.
I plagosuri është transportuar me urgjencë drejt Spitalit të Sarandës dhe ndodhet nën kujdesin e mjekëve. Burime nga policia bëjnë me dije se gjatë momentit të goditjes, arma dyshohet të jetë shkrepur aksidentalisht në ajër, pa shkaktuar pasoja të tjera. Nga vendi i ngjarjes është sekuestruar si provë materiale një gëzhojë arme zjarri.
Forca të shumta policie ndodhen në vendin e ngjarjes dhe kanë rrethuar zonën. Grupi hetimor po punon për sqarimin e rrethanave, identifikimin dhe kapjen e autorit të dyshuar, si dhe dokumentimin e plotë të ngjarjes.
Lini një koment