Një plagosje me armë zjarri ka ndodhur në orët e para të mëngjesit të kësaj të enjteje në fshatin turistik të Borshit. Sipas informacioneve paraprake bëhet me dije se është plagosur një i ri, i cili fatmirësisht është qëlluar në dorë, duke shmangur pasojat e rënda për jetën.
Ngjarja ka ndodhur në ambientet e një lokali, ku dy të rinj, miq me njëri-tjetrin, po konsumonin alkool. Pas një debati verbal të nisur ndërsa ishin ulur në tavolinë, njëri prej tyre ka nxjerrë pistoletën dhe ka qëlluar shokun e tij. Menjëherë pas të shtënës, autori është larguar nga vendi i ngjarjes.
I dëmtuari është transportuar në spital dhe aktualisht ndodhet nën kujdesin e mjekëve, jashtë rrezikut për jetën.
Ndërkohë që autori u kap pas kërkimit policor të nisur.
I dyshuari është shoqëruar në ambientet e komisariatit të Himarës, ku ka dhënë dëshminë e tij dhe ka rrëfyer dinamikën e ngjarjes.
“Shërbimet e Komisariatit të Policisë Himarë, pas njoftimit për një konflikt të ndodhur në një lokal në Borsh, rreth orës 02:20 të datës 31.07.2025, janë angazhuar menjëherë, duke shkuar në vendngjarje.
Nga veprimet hetimore paraprake dhe këqyrja e pamjeve filmike, dyshohet se pas një konflikti midis disa shtetasve, shtetasi H. Ç. ka plagosur me armë zjarri, shtetasin E. Sh., 33 vjeç, banues në Krujë, i cili ndodhet jashtë rrezikut për jetën.
Autori i dyshuar, shtetasi H. Ç., 42 vjeç, banues në Borsh, është lokalizuar dhe shoqëruar në ambientet e DVP Vlorë, për veprime të mëtejshme procedurale”, thuhet në njoftimin e policisë.
Lini një koment