Një përleshje u regjistrua në plazhin e Kakomesë këtë të mërkurë, ku Gentjan Papagjika, 46 vjeç, banor i Sarandës, mbeti i plagosur pas një konflikti me një grup të rinjsh të zonës.
Sipas dëshmisë së të plagosurit, të rinjtë po lëviznin me një automjet dhe ndaluan pranë tij, duke e pyetur dhe ofenduar për faktin se po filmonte me telefon zonën e plazhit. “Pse filmon?”, mësohet t’i kenë thënë të rinjtë 46-vjeçarit, përpara se situata të përshkallëzohej në përleshje fizike.
Si pasojë e konfliktit, Papagjika pësoi dëmtime dhe fraktura në trup. Fillimisht ai mori ndihmë mjekësore në Sarandë, ndërsa më pas u transportua drejt Janinës, në Greqi, për trajtim të specializuar.
Pas ngjarjes, policia nisi kërkimet për identifikimin dhe shoqërimin e personave të përfshirë në konflikt. Sipas burimeve, bëhet fjalë për një grup të rinjsh të njohur në zonë, të cilët dyshohet se janë përfshirë edhe në episode të tjera problematike në të kaluarën.
Papagjika është me origjinë nga Nivica dhe, për shkak se disponon pasaportë greke u transportua për trajtim mjekësor në Greqi.
Lini një koment