Një aksident i rëndë u shënua pasditen e së premtes në fshatin Metoq të Sarandës, ku një mjet bujqësor përplasi një këmbësore 52-vjeçare, duke e lënë atë të plagosur rëndë.
Sipas njoftimit zyrtar nga Policia, drejtuesi i mjetit, shtetasi R. S., 77 vjeç, banues në fshatin Gjashtë, pasi shkaktoi aksidentin, u largua nga vendi i ngjarjes pa u ndalur për t’i dhënë ndihmën e parë të dëmtuarës. Ndërkohë pas hetimeve të kryera, autori u identifikua dhe u arrestua në flagrancë këtë të shtunë.
Mësohet se 77-vjeçari drejtonte një zetor pa leje drejtimi, në kundërshtim me rregullat e qarkullimit rrugor. Ndërkohë, e plagosura, shtetasja P. Z., 52 vjeçe, ndodhet në gjendje të rëndë shëndetësore dhe është transportuar drejt Spitalit të Traumës në Tiranë për trajtim të specializuar.
Policia ka referuar materialet në Prokurorinë e Sarandës për vijimin e hetimeve.
Lini një koment