Një 24-vjeçar nga Shkodra ka rënë në prangat e Policisë Kufitare në Sarandë, pasi u kap në flagrancë duke transportuar emigrantë të paligjshëm me qëllim kalimin e tyre drejt vendeve të Bashkimit Europian, kundrejt pagesës.
Në kuadër të kontrolleve të shtuara për parandalimin e emigracionit të paligjshëm, shërbimet e Komisariatit të Policisë Kufitare Sarandë konstatuan në aksin rrugor “Sarandë-Lukovë”, në vendin e quajtur “Lemi i Sofisë”, një automjet tip “Volkswagen” me disa shtetas të huaj në bord.
Pas ndërhyrjes, u arrestua në flagrancë drejtuesi i mjetit, shtetasi M. O., 24 vjeç, banues në Shkodër. Sipas hetimeve paraprake, dyshohet se ai po transportonte emigrantët ilegalë kundrejt një pagese, me një automjet të marrë me qira.
Policia sekuestroi automjetin si provë materiale, ndërsa hetimet vijojnë për identifikimin e personave të tjerë të përfshirë në këtë veprimtari të paligjshme.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme procedurale, për veprën penale “Ndihma për kalim të paligjshëm të kufijve”.
Lini një koment