Klubi i Butrintit ka zyrtarizuar emërimin e Artan Meçanit si trajnerin e ri të skuadrës për sezonin e ardhshëm. Ish-futbollisti sarandiot rikthehet në futbollin profesionist, këtë herë për të drejtuar ekipin nga stoli teknik.
Meçani, i cili ka veshur më parë fanellën e Butrintit dhe të Delvinës gjatë karrierës së tij si lojtar, mbylli rrugëtimin në fushat e blerta në fund të vitit 2016. Tashmë, në moshën 41-vjeçare, ai nis një kapitull të ri si trajner i skuadrës ku hodhi hapat e parë në futbollin profesionist.
“Me një përvojë të gjatë në futbollin shqiptar si trajner dhe njohës i shkëlqyer i lojës, Artan Meçani vjen për të sjellë risi në skuadrën tonë,” thuhet në njoftimin zyrtar të klubit sarandiot. Objektivi kryesor i këtij bashkëpunimi është ndërtimi i një ekipi konkurrues, i mbështetur tek talentet vendase dhe një filozofi moderne loje.
Karriera e Meçanit si futbollist përfshin edhe një eksperiencë disa vjeçare në Greqi, ku u aktivizua me disa ekipe vendase, duke përfaqësuar me dinjitet futbollin shqiptar jashtë kufijve. Tashmë, rikthimi në qytetin e tij pritet të sjellë frymë të re dhe ambicie të lartë për Butrintin.
“Mirësevjen në familjen Butrinti, trajner!” – shkruan Klubi Sportiv Butrinti në faqen e tij zyrtare, duke i uruar suksese në këtë aventurë të re që ka ngjallur entuziazëm tek tifozët sarandiotë.
Lini një koment