Policia e Sarandës ka vënë në pranga një 31-vjeçar nga Kosova, pasi gjatë një kontrolli në automjetin e tij iu gjet një armë zjarri me municion.
Shtetasi me inicialet Sh. M., banues në Gjilan, u ndalua teksa qarkullonte me automjetin tip Range Rover në Ksamil. Gjatë kontrollit, shërbimet e Policisë zbuluan një pistoletë tip Beretta, me një krehër të mbushur me fishekë, e cila u sekuestrua së bashku me automjetin.
“Në vijim të kontrolleve të shtuara për garantimin e rendit dhe sigurisë publike gjatë sezonit turistik, shërbimet e Komisariatit të Policisë Sarandë organizuan dhe finalizuan operacionin policor të koduar ‘Impact’. Si rezultat, u arrestua në flagrancë shtetasi kosovar Sh. M., 31 vjeç, banues në Gjilan, Kosovë”, thuhet në njoftimin zyrtar të policisë.
31-vjeçari do të përballet me akuzën për “armëmbajtje pa leje”, ndërsa materialet hetimore janë referuar në Prokurorinë e Sarandës për veprime të mëtejshme.
Lini një koment